FENOMENA PUISI SI TAKLUK JAGAT
SANG SAKO BANGSO
(Nukilan Khas Untuk Dato’ Seri Utama Haji Mohamad Bin Haji Hasan)
Kenapo lambek amek jarum jam tu berkalih
Tigo saat sekali ko baru dio nak berdotak
Tak sabar ghaso 'e ese nunggu tigo tahun lobih laie
Tapi tak apo ... pojam colik, pojam colik akan sampailah hari yang dinanti-nanti
Koghih dokek Sang Sako Bangso tu dah lamo siap bermandi an limau nipih
Berdongung mato 'e tiap kali terkono lenggok asap kemonyan
Ontah sampai bilo la ese dapek menjinak an warisan tuk nenek ese ni
Sobab makin kuek ghonto 'e maso nak masuk an balik dalam sarung sonjo tadi
Sekarang seribu kali 'Laa ila haa illallah' jadi amalan tetiap malam
Siang pulak selawat nabi tu memang tak putuih ese baco
Jangan kato taiko nago tanah bosa nak datang melibeh
Gunung Angsi pun kok berani melinteh memang jadi ghato ese tobeh
Moh la ambik wudhu' waghih, beghosih an la diri jang
Lughuih an saf dokek belakang, biar ese jadi imam
Kogheh an sikit suaro tu bilo mengamin an surah Al-Fatihah yang ese baco
Biar kocut tolo musuh tu bilo donga gemuruh 'e amin kito
Ini tanah tumpah darah kito sedaro
Orang dedulu koba an biar putih tulang jangan putih mato
Nenek moyang kito lukuih bermandi darah nak mempertahankan
Sekarang ni sampai maso untuk kito pulak
Jangan nanti tanah dah tingga segonggam kito masih laie leko bersorak
Nukilan: Si Takluk Jagat
18 Ogos 2019
No comments:
Post a Comment