BAJU BIRU TOK MAT (PUISI NEGERI SEMBILAN)

FENOMENA PUISI SI TAKLUK JAGAT

BAJU BIRU TOK MAT

BAJU BIRU TOK MAT

Pemandangan kampung ese ni memang indah
Nampak menghijau yo bukit sebolah nyebolah
Sayup-sayup donga menguak kobau pawah
Bulih buek hilang lotih dan hilang lolah
Sambil duduk berjuntai kaki ateh permatang sawah
Duduk sendiri melayan hati ese yang gundah
Mengonang an nasib anak bangso ese
Ado laie ko maso dopan 'e?
Bulih laie ko bangso ese ni bersatu?
Dalam keadaan sekarang yang serobo tak menontu

Kusut kepalo ese ni memikir
Tak beghonti hati ese ni berzikir
Mintak Allah boghi ese ilham
Macamano nak berosih an balik baju yang dah hitam
Nak sonta kuek bona kang kuyak lak baju
Nak ghondam lelamo kang pudar lak biru
Kok ese simpan yo kang ramai pulak yang akan terlupo
Pado baju biru yang dah banyak bona berjaso
Baju biru tu la pemangkin semangat anak bangso

Pempelahan ese colup an kaki dalam air
Nampak tonang boto arus sungai ni mengalir
Sojuk 'e air menyogar an kaki
Jeronih 'e air menyojuk an hati
Tapi tak dapek jugak menyogar an jiwo yang rawan
Tak dapek juo menyojuk an paneh dalaman
Bilo tengok hak bangso ese cubo di anak tiri an
Ngonang an nasib anak negori ese di maso dopan
Kok ese takdo sok sapo la yang nak mempertahankan?

Tetibo bangkit semangat dalam diri
Meruap-ruap sampai bulu romo ese berdiri
Tak tahu la sobab an dek sojuk 'e air tu ko
Atau pun sobab Allah swt dah boghi ese ghoso
Kampung ese ni nampak 'e dah banyak bona perusak
Lopeh ni ese nak poie pulak belajar menembak
Biar ese tembak an semuo babi dan gagak
Biar kobun anak bangso ese tak laie nampak somak
Biar pulih semangat masing-masing anak beranak

Limo tahun tu tak lamo
Tapi ese kono buek balik daripado mulo
Baju biru ni ese nak beghosih an boto-boto
Biar hilang abih semuo bondo-bondo kotor
Biar nanti maso ese pakai dokek dopan perhimpunan
Tambah bersemangat tinggi semuo kawan-kawan
Ghaso kocut hati semuo pihak lawan

Semugo Yang Maha Kuaso tunjuk an ese jalan

Nukilan: Si Takluk Jagat
31 Ogos 2018